يلا نحب بلدنا كتير

يلا هنبنى وفيها نعمر

نحصد خير من طرحها الاخضر

 نزرع فيها شجرة جميلة

على اغصانها بيوت عصافير

يلا نحب بلادنا كتير

دى قلوبنا هتبات فرحانة

لما تكون بالخير مليانة

ونحقق احلامها فى بكرة

ونزوق شوارعها  بخير

يلا نحب بلادنا كتير

يلا نعلّى ايد مع ايد

نرسم بكرة بشكل جديد

ونلبسها توب الفرحة

ونزوقها ليوم العيد

يلا نحب بلادنا كتير

مش راح نقبل غيرها بديل

يلا نغير ونغيرها

ونرجعها هبة النيل

يلا نحب بلادنا كتير

لما تحب ..

لما تحب بتلقى الكون حواليك 
أنغام
أحلام وردية تجيبلك فرحة وتوديك 
أحلام
لطريق مفروش بزهور تتغير فيه 
أيام 
يتبدل فيه الحزن بفرح ويبقى خلاص 
أوهام
لما تحب بصدق تغيّر كل قلوب 
الناس
حتى القلب الحجر المطفى تلقاه يصبح 
ماس
واليأس يزول ونخلي الأمل الجاى فى بكرة 
أساس
لحياتنا علشان يجدد شوقنا ويزيد الإحساس
فبلاش تتعود على أحلامك لا عودهاعليك
هتلاقى الدنيا براح قدامك ملك أيديك
وتلاقى البسمة بتسكن قلبك ظاهرة عليك
ومهما تكون فى الكون مع نفسك
تلقى قلوب حواليك
 .... ده لما
تحب هتلقى الكون حواليك أنغام

"" نادية ""

أنا وأنتِ

أنا وأنتِ

مشينا السكة للآخر

وفى الآخر

بقينا بنفترق فينا

يا نبض القلب وسنينى

يا نور فى العتمة يروينى

وبرجع تانى أسألنى

بعدنا ليه عن إمبارح ؟

وليه يبقى الزمن جارح ؟

وليه الحلم مش لينا ؟

ومين فينا هيقدر يوم

يزيل الحاجز العازل

ما بين الصوت وترديده

ويبْدل نغمة الألحان

لصوت الموج على شطوطك

يمد عروقه يرويكى

ويحييكى يا غصن زيتون

ومين هيكون فى يوم فرحك

بيغزل من خيوط الشمس فستانك

علشانك ...

سحبت عروقى من أيدى

وبشغل من حروف أسمك عناقيدى

وبنده على النجوم قيدى

فى عتمة ليل ولو طوّل

وزينتك بتاج أبيض على جبينك

وبيضوّى بدقاتى

وحتة من السما الصافية بلون قلبك

وعمرى يمد قدامك على السكة

بساط ممدود

يعدّى لألف ألف حدود

ده من الأول أنا وأنتِ ما بينا وعود

وحتما يجيى يوم ونعود

لنفس السكة من تانى

عشقتك وأنتِ عشقانى .

،،،، نادية ،،،